Recuerdos: Una istoria de amor





Yo kero kontarvos komo me espozi, (esta
semana kumplimos 48 anyos de kazados). Akel tiempo eramos grupo de ijikos i ijikas de la mizma "mahalle" i siempre pasavamos las tadres kon baylar i sinemas enjuntos. Mi mujer era ermanika de una amiga del grupo, ma komo era chika no la resivimos. Ansi pasaron los anyos, los mansevikos mos izimos "askeres" (turko) SOLDADOS, el grupo se despartiyo, la ijas konoseyeron otros mansevos i se fueron kon eyos. La ermana de mi mujer se kazo kon otro no de muestro grupo.

Un diya enkontri en la sivdad el marido de la ermana en avlando, paso una ija de 18 anyos ermoza i elegante, se aserko i mos saludo. Akeya ora vide ke la ermanika chika se izo una doncella. Despues ke se fue, le dishe al kunyado ke eya se izo ermoza.

El me disho,
"la keres" ? i yo por riyir dish
e " si".

Despues de kuantos diyas, pasi por al lado de la butika de la madre en indome a mi kaza. La madre me yamo i yo entri, eya me prunto, la keres a Viktoria ? yo no estava
pronto a esto, me salio de la boka, "si".






Me disho :
"Alora enbiya tu padre i madre ke vengan demandarla".

I ansi fue. I mos dimos palabra. Al diya mos fuimos al sinema kon la ermana i el marido para guardar ke no va echar mano!!!!!!

El espozorio se izo en la guerta de mi eshuegra, komo una boda. Akel diya se dyo la data de kazar. Despues de un anyo mos kazimos.

El ke dyo dota, fui yo. En akel anyo merki kaza i moble i mi mujer se entro a la kaza kon su ashugar. Ansi pasaron 48 anyos sin regretar.

Trayimos al mundo 3 ijos. Agora los dos son
kazados i uno "bekar"(turko) {soltero en espanyol}.

I tenemos tres inyetos maraviozos. Agora puedemos kantar la kantika, "la istoria de un amor". Espero ke otros kontaran komo se kazaron.

saludos.

joseph Negrin-Israel
Comments