Los Sefaradim en la Shoah

par Rachel Amado Bortnick

Nous reproduisons ci-dessous avec l'aimable autorisation de son auteur un article déjà paru dans El Almanecer. Rachel Amado Bortnick est également la fondatrice et l'une des modératrices du forum de discussion en judéo-espagnol Ladinokomunita.

Sur ce même sujet nous vous proposons également un témoignage de Zamila Kolonomos sur la Shoah dans les Balkans paru dans le n°32 de La Lettre Sépharade: Komo me asalvi del Holocausto ? En kombatindo se ainsi que Retorno del Inferno du Dr. Braha Rivlin, lui-même rescapé des camps témoignage paru dans le n°49-50 d'Aki Yerushalayim.


Desde la fin de la Sigunda Gerra Mondial en 1945, i sovre todo en los kavos 30 anyos, vimos una dokumentasion imensa de la katastrofia umana ke yamamos el Holokausto, o la Shoa. Se publiko estudios, testimonyos de sovrebivientes, livros, i artikolos; se establesyo muzeos, se produsyo filmos i programas de television, i mas. Ma en esto todo kaje ke no se mensionan los 160.000 Sefaradim1 ke se deperdieron en la Shoa, ni el resultado katastrofiko de estas muertes para la kultura i lengua djudeoespanyola. Solo en los kavos 10-15 anyos vimos la publikasion de livros eskritos por sovrebivientes Sefaradis, i estudios sovre la Shoa en las komunidades Sefaradis. Ma aun kon esto, el publiko en jeneral i el publiko Djudio en partikolar (I malorozamente munchos Sefaradim) tienen la yerrada empresion ke la Shoa toko solo a los Ashkenazim de Evropa.

En el 24 Marso 2003 tuvo lugar una seremonia grande i esmoviente en Auschwitz-Birkenau, asistida por sienes de Sefaradim de munchos paises, ande se inoguro la laja komemorativa en Djudeoespanyol 2 en el monumento onorando las viktimas de este kampo de muerte. Ma el monumento mezmo fue enstalado en April 1967, kon vente lajas, kada una enskritas en una de las varias lenguas reprezentando las lenguas de los viktimas. Deke enstonses no se metyo la laja en djudeo –espanyol, lengua de unos 60 000 Sefaradim ke fueron emprezados i kaje todos matados ayi ? La razon es klara : mezmo los “ekspertos” ke izieron parte de la komite del monumento no savian ke los viktimas de Salonik i Rhodes en este kampo eran Sefaradim ke avlavan entre eyos, no el Grego (asigun les paresia), ma el Djudeo-espanyol. i estos “ekspertos” no savian tambien ke munchos viktimas de otros paises de Evropa eran de orijin Turko-Otomana, i ke eyos tanbien avlavan el Djudeo-espanyol. El profesor Haim Vidal-Sephiha, sovrebiviente Sefaradi de Auschwitz (ke avia sido deportado de la Bejika) fue el ke se apersivio de esta mankura en el monumento, kuando el fue invitado a Polonya por un programa de radio en Marso de 2000, i retorno a Auschwitz por primera ves desde su liberasion en 1945. Despues de largos esforsos suyos i de Michel Azaria (I sus fondasion de JEAA), la laja en djudeo-espanyol fue enstalada finalmente en 2003.

La Shoa destruyo grandes komunidades Sefaradis en Gresia, Serbia, Bosnia-Hersegovina, Kroasia, Masedonia, Trakia, i las islas del Ege. Kontamos entre eyas Salonik (la mas grande, ke se yamava “Madre de Israel”), Belgrado, Sarayevo, Monastir, Rodes, Girit (Crete), i otras. Ademas, miles mas de Sefaradim fueron deportados djuntos kon todos los otros Djudyos de varios paises de la Evropa oksidental i oriental (de Fransya, Beljika, Austria, Romania, Hungaria, i Italia), i toparon la misma fin maloroza.

Los efetos direktos i indirektos de la Shoa fueron grandes en otros paises tambien. Por egzemplo, en Bulgaria, ke no deporto a sus Djudios, o Turkia, ke no entro a la gerra, uvo aktos antisemitas, i despues de la gerra las komunidades se enchikesieron drastikamente kon emigrasion masiva, jeneralmente a Israel.

Déportations de la zone d'occupation bulgare.
Musée juif de Grèce.



La Shoa fue katastrofia para todos los Djudios, sin diferensia a Ashkenazi, Sefaradi, Romaniot, o otro. Ma komo Sefaradim mos kaye a entender ke los efetos de la Shoa fueron igualmente o mas traumatikos i katastrofikos para los Sefaradim i para la kultura i lengua djudeo-espanyola. Aunke los 160 000 Sefaradim depedridos reprezentan una proporsion muy chika en los sesh milyones de Djudios asasinados, en proporsion a la populasion Sefaradi mundial3, muestra piedrita fue muy grande. En este chiko espasio, podemos solo mensionar en kurto las komunidades ke fueron destruidas, porke kada una de eyas, komo la estorya de kada persona ke se deperdio o sovrebivio la Shoa, merese a lo menos un livro entero.






1 Esto es una estimasion de JEAA (Judeo-Espagnol a Auschwitz) ke aparese en sus literatura i en sus sitio de web. No se puede saver el numero de Sefaradim, porke eyos fueron inkluidos kon todos los djudios ke se deportaron de los paises.

2
El teksto (el mizmo en todas las otras linguas) de la laja en judeo-espanyol es : “Ke este lugar, ande los nazis eksterminaron un milyon i medyo de ombres, de mujeres i de kriaturas, la mas parte Djudyos de varyos payizes de la Evropa, sea para syempre, para la umanidad, un grito de dezesperoi unas sinyales. Auschwitz – Birkenau 1940 – 1945.”

3
Ni este shifro no se save egzaktamente. Asegun el JEAA, avia 360.000 Sefaradim en Evropa antes de la Sigunda Gerra...