Maraviyas de Hanuka

Notre amie Sharope Blanco qui habite Istanbul et anime avec grand talent le forum "sefaradimuestro"  a écrit une jolie série de poèmes sur Hanouka, un pour chacune des bougies colorées que nous allumons le soir pendant les huit jours de la fête. Il s'intitule "Maraviyas de Hanuka" , "Merveilles de Hanouka".

 " Maraviyas de Hanuka "

1 EL VEDRE

Esta noche me siento muy oroza i yenna
d'alegriya... Asiendi la primera kandela
de Hanuka de kolor vedre...Es la kolor de
las esperansas, de la paz ke rogo para
todos en el mundo, de la manseves i de la
freskura i lo mas de una buena salud...

Rogi al Dio por todo esto kon mi kandela
vedre ! Le rendi grasyas por los milagros
ke mos izo i por siempre darmos fuersas
para luchar kontra las difikultades de la vida i las dolores ke sufren los hazinos.

Rogi para ke la "LUZ " i la "KAYINTOR"
de l'amor , de la kreensya i de la
esperensya nunka s'amate en muestros
korasones.


" Maraviyas de Hanuka "

2   EL  MAVI-BLEU  

Esta tadre asyendi la sigunda kandelika de Hanuka. Tan delgada, fina, portanto tan kerida i ermoza ! La kandelika ke en eya sintiya las kantikas de mi chikez, mi padre tomandome a su lado para azerme dizir los biervos tan no konosidos ma tan dulsez a mi oreja. Mi mamita allado de mozotros kon su soriza de anjelo...

Kandelika de la kolor de la mar i de los siyelos ! Kandelika de la kolor de los ojos de mi ijiko presyado ! Kandelika de la kolor de los sielos, la immensitad i de la buendad sin limitos del Dio !

Rogi para ke muestros dezeos se realizan i ke sintiemos alegriya en estos dias de alegriya.
Rogi para los ke estan leshos de sus kazas, en kantones de  hospital o sin razon pudriyendosen en las prizyones, porke no es injustisia lo ke manka en este mundo !   Dishe ALLELLUIA porke para mi es lo mas ke se puede dizir en una sola palavra.

Ke la "LUZ " siempre illumine vuestros pasos...

" Maraviyas de Hanuka "

3  EL KOLORADO

.....I yegimos a la tresera noche de la
fiesta de las kandelikas !

Me namoro mirarlas dospues ke las asyendo ! I...Es verdad ke dizemos ke no kale uzarlas para tener luz en kaza o kayintarmoz kuando tenemoz friyo ! Son solo para mirar !

Mi kandelika esta tadre era korolada...
Kandelika kolorada para los ke se aman i
se sienten namorozos i la pasion buye en eyos !

El amor....El mas ermozo sentimiyento ke
Dio mos regalo ! El amor ke eskrivyo historya munchas vezes, el amor ke mostra kamino a los mansevos, en lo mas de kavzos, i konstruizen sus futuros kon el... El amor de fuersa derrokador o ke yega al Gan Eden... Ke mos puede azer esklavos voluntaryos de la persona amada...

Rogi al Dio para ke mostre el kamino djusto a las personas enlokesidas i asyegados por el amor i los sentimentos irrasyonales ... Ke topen repozo en sus almas i puedan tomar las desizyones justas en sus vidas.

....I porke el amor no tiene kolor, edad,
lojika, lugar i no entyende de "no es posivle "

Rogi para ke " La flecha de Cupidon " entre
en los korasones de eyos ke se "pueden" amar i ke tiyenen los kaminos libres sin dingun obstaklo delantre de eyos....

Rogi para ke las personas se enamoren porke enamorados nunka pensaran a azer gerras o negrigura !

Ke la kandelika korolada del amor toke i
kalyente todos los korasones ambyertos de afeksyon i de amor.

"Maraviyas de Hanuka "

4 EL AMARIYO    
  
Una noche de invierno...Luvya, ayres lokos afuera... Los gatikos de la kaye estan eskondidos en sus abrigos mal tapados...Los perros no estan djugando kon alegriya...No los veygo i no los oygo. Friyo i soledad en las kayes...El park esta vaziyo.

Mi kazika, kayintada, yenna de luzes en esta kuatrena noche de fiesta de las kandelikas ! Ize pomchikes.
Es ansina ke yamamos las "sufganiot" ebreas en Turkiya. Son un tipo de bimuelos fritos kon dulse ariento. Komiya sin artarme de estos kuando estava en Israel !

Mos aviyan ambezado en el Ulpan [la skola ande se ansenya el ebreo a los ke yegan a Israel] komo azer esta dulsurya en dias de Hanuka. Ya lo se ke no kale
komerlas ! Engodran i no son nada bueno para la salud ma komo es posivle de olvidarse ke egzisten en esta fiesta ? Yo solo gosti i las ofri a todos ke se topavan
en mi kaza esta tadre. Se namoraron !

La kandelika ke asyendi esta tadre era amariya. Es la kolor de la tristesa, del final de la vida, de las ansyas i de la hazinura... No me plaze esta kolor. Teniya ke asyenderla porke se topava entre todas las
otras kandelikas !

Rogi para todos ke se topan en oras pretas kon tristesa en el korason...Para ke los hazinos se agan buenos lo mas presto posivle..Para ke los ke tiyenen de murir no
sufran i se bolen komo pasharikos al otro mundo, sin darsen kuenta mizmo....Rogi para ke el Dio se apiyade de los animalitos ke biven en las kayes, medyo artos
medyo ambiyertos...Ko no sufran del friyo o de hazinuras.

Rogi para los " sin kaza " arondjados de sus vidas... I ke la kandelika amariya kuando se va amatar, ke yeve kon eya endjuntos todos los males ..


"Maraviyas de Hanuka"    

5  LA KOLOR NARANJA
 
" Baruh Ata Adonay, Eloheynu Meleh ha Olam.... " son las palavras majikas ke repetimos kada noche de Hanuka en asyendendo las kandelikas de todas las kolores. Siento una alegriya en el mas profundo de mi alma, komo si dingun
mal me pudriyera alkansar en este momento.

Esta noche era el torno de la sinkena kandelika. Avagar avagar se esta inchendo la hanukiya !

Me plaze asentarme enfrente de eya i mirarla en arogando al Dio para ke las luzizikas le yeven todo lo ke sale de mi korason.

Mi kandelika esta tadre era de kolor narandja. La kolor de la kayintor, del sol, de las flamas i de las frutas del invierno komo si Dio mos kijyera kayintar por los ojos en los dias yelados i grizos del invierno.
La kolor kon la kuala la persona se siente buena i refleta la LUZ.

Me akodro de los fuegos ke asyendiyamos las noches freskas, para kayintarmos i pasar una nochada maraviyoza debasho de las estreyas en las arenas al bodre del mar. En las playas asoladas de Ashkelon, Tel Aviv, Herzelia, Natanya, Tantura Mihmoret i Elat kantavamos i baylavamos las kantikas ebreas, alegres i tristes, akompanyadas kon las melodias ke salian de las gitaras de muestros amigos. Metiyamos las patatas a la lumbre i las komiyamos kon una savor ke nunka me vo olvidar. Aya, en frente de las flamas del "kumzits" mos avriyamos los korasones i eramos todos ermanos
i mizmo los namorados eran primero mijor amigos...

Asperavamos para ke el sol amaneska i ver las maraviyozas kolores del sielo ke se aklarava poko a poko. No me viyene de la mano no dar razon a todos estos puevlos de los tiempos antigos ke adoravan el sol i baylavan en frente de el en el amaneser. Es divino !

Esta tadre rogi solo para mi ijiko. Rogi para ke siempre sienta la KALOR del amor de su mamita i de su papa en todo su ser. Rogi para ke esta kalor le de fuersas en lo ke esta azyendo para salvar las personas de sus dolores i darles vida...

Para ke le venga fuersa a sus manos kansadas en los momentos los mas kritikos de las operasyones.

Rogi para ke seya sano i rezyo i orozo i alegre siempre por ke lo merese mas de todos en este mundo. Le konti al Dio ke buena persona ke es, ke dulse i ke jenerozo... Le dishe ke lo bendiziya ke lo amava muncho i ke me lo kudye ayi, en Londres por ke yo no esto a su lado...

Le mandi bezos kon el ayre ke le va karesar las karikas, de Istanbul fina Inglaterra....

Ke vos yege la LUZ i la KALOR de me kandelika narandja fina vuestras kazas.


"Maraviyas de Hanuka "

6 EL ROZ

Para la sejena noche de Hanuka mi mano
se fue derechamente a la kandelika ke
me estava azyendo ojiko des de la primera
noche....Una kandelika entravada, timida,
ermoza entre las ermozas....Tan romantika !
Esta kandelika teniya toda la dulsurya
de las senyoritas de su edad i de su klasa !
La kije guadrar para la dalkavo noche ma
no puide asperar mas...La keriya ver
asyendida, alegre i soriyendo kon su luz
ke kayinta.


----------
La kandelika roz de la kolor de las rozas de mi guerta
Das allegriya i sembras luz para todos en esta fiesta
Kandelika roz... Oye mi boz ! Trayemos mazal i bueno
Arekayinta kon tu kalor mi korason mismo en mi suenyo.
----------


Roz es una de mis kolores preferidas. La kolor de la afeksyon, del romantizmo i del amor puro.

La kolor de los sonyos i de las esperansas.
El simbolo de la mujer i de la feminitad,
de la delikatesa, de la koketeriya i de la ermozura.

Rogi al Dio para ke embiye mazales buenos a las ijas de Sion...Ke seyan buenas espozas i buenas madres en sus familyas. Ke tengan el ojo arto i sepan guadrar la amistad i el respekto de sus maridos. Ke seyan ijas buenas para sus madres i padres i seyan las reynas de sus kazas, el pasharo ke kudya su nido al presyo de su vida !

Rogi por las mujeres ke sufren de la viyolensya de sus maridos o de sus padres....Las ke se espantan de fuyirsen o revoltarsen a esta dezgrasya i kontinuan a sufrir kon kayades.

Rogi para ke el Dio se apiyade de eyas i les
mostre un kamino de salvasyon porke no existe nada ke El Todo Poderoso no pueda lograr.

"Maraviyas de Hanuka"

7  EL DORE

La sietenaa noche de HANUKKAH,  pishin pishin tomi las kandelikas dore del kuti de teneke/tin pintado kon figuras tan ermozas.
A me me plazen muy muncho estos kutis de 
todas las formas echas de teneke ma 
maraviyozamente dekoradas al eksteryor.
Lo mas son kutis nostaljikos del fin del
sieglo 19 i del empesijo del sieglo 20.
Las uzavan por todo modo de kozas.
Bobones, biskochos, kafe, te i asukar,
algodon, talk, havanas, shokola  ets.
Munchas dammas uzavan estos kutis para
guadrar alfinetes, algujas de kuzir, 
dedal, ilos de todas las kolores i tijeras 
kon mizura, mizmo un poko de shavon para
markar la ropa antes de kortarla o darle
la forma ....  La tinajika de los botones
kon los kualos yo jugava muncho no kaviya
aryento del kuti de kuzir (la muestra era
en rafya) i la metiyamos aparte.  Dunke,
porke yo so tan nostaljika i romantika 
me vi koleksyonando un poko de estos kutis !
Me tresalgo de eyos ! Una d'entre eyos lo
ize kuti de kandelikas i es esto ke vos 
estava dizyendo al empesijo ! 

Las kandelikas dores, todas estavan vistidas
de fiesta por HANUKKAH .  Estavan finas i
boltadas komo vidas/visses  para ke tengan 
el fostan komo volanes en diagonal !
  
Rogi para los ke no tienen kaza i estan medyos hazinos en las kayes en estas noches tan yeladas.
No solo por las personas ma por los animalitos  ke tremblan del friyo i ke no toparon de komer puedeser tambien !  Por las madres, komo mi, ke se eskarinyan tanto de sus ijos ke estan leshos o azyendo sus servisyos militar.  Es una dolor ke nunka eskapa el karinyo...Komo siempre rogi
por los hazinos en los hospitales i los viejizikos ovligados de kedar en los lugares ande los miran, en vezes bueno i en vezes del todo !  Se akodran de sus kazikas, kuando dingunos les diziya kuando echarse a durmir i kuando mirar la TV o azer
banyo o no azer ! Kualo komer i kuando ! El
tiempo ke puediyan ver mas o menos kon los antojos i puediyan meldar livros por pasar el tiempo.

Meldar i eskrivir son kozas ke la persona no se puede pasar.  Bueno el eskrivir aksepto ke no es para todos ma meldar ? 

Vos mando sorizas i luzizikas a vuestras kazas !


"Maraviyas de Hanuka"

8 TODAS LAS KOLORES

Ocho diyas pasaron agora..
La dalkavo noche de Hanuka 
Es una fiesta maraviyoza !
Kolores i  luzes 
Se ven en las kayes ...
La hanukiya esta asyendida entera, 
Es la hora para kantar Su Glorya.
Komo un buketo de las 8 noches, 
Ay kandelikas de todas las kolores !

Mi tefila esta noche para todos los judyos.
Ke no ayga mas antisemitizmo i odyos.
Ke el mundo kontinue a envedreser,
Ke ayga luvyas para pueder komer,
Ke ayga junglas i bastante para bever.
Ke no se seke muestra planeta,
Porke la agua sinyifika VIDA.
I Hanuka es la alegriya 
Ke la luz de la kandelika mos da !

Sharope Blanco
21 de Oktobre 2009

Comments